有個日本人，想用自己嘅雙腳，將台灣「百岳」連成一條線，就似寫一筆書咁。呢位就係43歲嘅日本冒險家田中陽希，佢預計11月1日從台灣最北端嘅富貴角燈塔出發，不坐任何交通工具，全程靠腳，用大約4個月、徒步約2000公里，完成呢個佢話「用自己雙腳把台灣百岳連成一條路線」嘅「台灣百岳一筆書」挑戰。
先交代一下呢個「狂人」嘅履歷：佢2014年用208天完成日本百名山（約7800公里）、2015年用222天完成日本2百名山（約8000公里），2018年起再用1310天串聯日本3百名山、登頂301座。由日本山寫到台灣山，佢嘅「筆」越寫越遠。
李逸洋指，台灣面積只有日本十分之一，但有268座海拔逾3000公尺嘅高山；外國人完成百岳最快紀錄係分多次、耗時3年8個月。田中若能在約4個月內一次過完成，將會「寫下新紀錄」。
不過佢原本想春天出發，卻被台灣登山界勸阻，話雨季加颱風太危險，最後改咗11月。從富貴角到第一個登山口就有約150公里公路要步行，之後沿中央山脈向南，途經雪山、南湖大山、合歡山、奇萊山，2月上旬攻玉山，3月登北大武山，最後到台灣最南點碑收筆。
全程125天，約80天要喺山區過夜（38晚山屋、39晚帳篷）。佢話台灣山屋補給不如日本，揹包可能要背30至40公斤糧食水。最擔心係1月3日起嘅15夜16天縱走，人煙罕至、部分山徑已失修，獸徑又多到分唔清邊條先係真路。
硬蕉抽兩句：呢個唔係登山，係「寫」一幅2000公里嘅「行書」。佢由2014年開始，用十幾年寫日本山，而家要寫一幅連字都分唔清嘅作品，仲要背住40公斤「筆墨」，寫完一筆再寫一筆。正常人坐飛機去台北玩兩日都成條腿爛，佢要行4個月。呢筆「書」如果真寫到收筆，將係一條冇人寫過嘅史詩級筆畫。
硬蕉哥整合｜頂硬上
