廣州最近發生咗一件令人啼笑皆非嘅事：有市民喺地鐵站入閘範圍看書，睇完一本先走，出閘時竟然被自動扣走15人民幣「超時費」。
據《南方日報》報道，廣州市民方女士日前搭廣州地鐵18號線到番禺廣場站，路過站內設嘅「讀書空間」時一時興起坐下睇書。佢咁睇住睇住，一睇完成整本書，再起身去出閘，先發現帳户除咗正常車費，仲被扣咗15元人民幣（約17.6港元）超時費。方女士全程喺入閘範圍停留咗約5個鐘。
唔止方女士一個。另外一名住花都區嘅求職者，當日中午12時10分進站去市區應徵，見到面試時間未至，就喺入閘範圍座椅坐低改履歷、遞履歷，到下午5時09分出站，前後停留約4小時59分，翌日同樣收到15元人民幣扣費通知。
事件喺社交平台炒得風生水起，有網民留言「居然仲有超時費」、「以前完全唔知」。廣州地鐵客服其後證實，現行規定確係設270分鐘（即4.5小時）最高乘車時限，超時者出閘時須按出閘站點線網單程最高票價，即15元人民幣補繳。廣州地鐵仲補充話，今年7月之後服務熱線收到嘅超時扣費查詢按月增加7.61%，多數乘客話係因為等人、睇短影片或者玩遊戲而忽略時間。地鐵方面強調，地下鐵本質上係公共交通工具，主要功能係提供快速載客服務，並非供長時間滯留嘅場所。
講到呢度，好多人可能會問：港鐵唔係都有限制？啱。港鐵規定入閘逗留超過150分鐘，須繳交相當於最高單程車費嘅附加費，現值66港元。即係話，廣州270分鐘扣¥15，港鐵150分鐘扣$66，邊個慳啲一目瞭然。
其實呢個規定並非廣州獨有。深圳地鐵停留時限210分鐘，東莞120分鐘，北京4小時，上海超過4小時按網絡最低票價3元補票。
姣姐講多句
講到港人搭MTR，好多人以為入閘之後瞓到碌醒、喺轉車站坐低等下一班車都冇問題，但點知港鐵同樣有限時：逗留超過150分鐘一樣要補附加費，而唔止廣州，深圳、北京、上海都設有類似規則，喺任何城市嘅地鐵站當「大廳」坐太久，都有機會被計時。唔知邊個設計到站內要設閲讀區同便利店，但又要同時設時限收超時費呢？站內設噚書區係好嘢，但最起碼該寫得大字告示：「看書唔使錢，超過4.5個鐘就要錢。」
黃姣姐整合｜頂硬上
