點先至係真正嘅跨界？印刷廠出產到木耳。
日本埼玉縣川口市有間為《每日新聞》等報社提供印刷服務嘅工廠，因為報紙印量逐年下降、設備越做越精緻，廠入面騰出大片閒置空間。印刷副部長多久幸男就話，我哋成日盯住紙張油墨嘅温度濕度，呢個手藝點唔可以攞去種菇？
道理其實唔離譜。紙張一受潮就變形，油墨乾濕唔穩就會掉色，所以成間廠多年嚟都有做 24 小時温濕度監控同管理，嗰套精準環境控制嘅經驗，原封不動就可以用喺對温濕度極其敏感嘅木耳栽培上面。廠內空置位加埋自動灑水設備就搞掂，無須另購新廠房，省下大筆投資。
呢個真係唔係試玩嘅野。工廠早在 2024 年 4 月已經開始在廠內測試栽培，栽培設施最多放得落 5,600 個菌床，當時日收成約 20 至 30 公斤，而家升到每日約 30 公斤。產品命名「彩のきくらげ」，除鮮木耳外仲有乾木耳同加工品。
最勁係賣點。呢間廠種嘅木耳主打日本本國產、新鮮、營養高——日本市面上約九成木耳都係來自中國，本地貨自然有價値。而呢啲菇已經賣進首都圈部分紀之國屋超市，東京部分酒店拿去做酥皮同醬汁料理，高級中菜館同學校膳食都有份。廠方仲計劃加種白木耳、擴建工廠，目標做到全國配送。
姣姐講多句：CMYK 四色印到印唔起量，寧願轉頭去印一朵朵黑木耳；呢個先叫「印」嘅第二春。全港最正經嘅行業都搞到要轉行種菇，可見傳統傳媒呢條船，真係唔係只有我哋一啲人覺得要翻。
