想收一盒過節甜點，最後收到嘅係雪櫃、電視、手機同成疊外賣，仲要自掏腰包付款——印度馬杜賴嘅網紅韋拉馬尼（Veeramani）最近就中招。
排燈節（Diwali）將至，佢喺社交平台發帖話希望有人送盒甜點，順手公開咗聯絡資料同住址。未料到惹起全城惡作劇狂潮：大批網民用佢嘅個人資料瘋狂網購，全數揀「貨到付款（Cash on Delivery）」，要求送貨員將佢從未下單嘅昂貴貨品送上門。
據佢喺片入面講，短短半小時就有15名送貨員接連登門，部分人仲長途跋涉趕來，其中包括索價16.9萬盧比（約1.4萬港元）嘅電視訂單。佢表示既冇下單、冇錢俾、更加冇辦法提供交收所需嘅一次性驗證碼。佢自己都唔滿意送貨員被無端捲入、反覆奔波。
佢崩潰拍片下跪求饒：「我向你們跪求了，請停止下單。」又嘆道：「電話關掉有問題，開着也有問題。」鄰居透露，除咗電商送貨員，當地外賣平台 Swiggy 同 Zomato 嘅送餐員都日以繼夜敲門。網上其後仲出現聲稱替佢訂購挖泥機同軍用坦克嘅截圖，但報道指相關內容純屬網民二次惡搞嘅虛構截圖，並非真實交易。
連番哀求仍遏止唔到風潮。據印度報業托拉斯（PTI）報道，記者及網絡創作者到其住所視察時，大門早已深鎖，鄰居稱佢因不堪騷擾已收拾行李離家。佢其後喺最新短片自稱正在外地旅行，他人已無法追蹤其行蹤，落腳點及歸期未知。
姣姐講多句：想收禮物唔使公開住址，呢個係基本常識啦。送貨員無端背鍋最可憐，佢哋只係按單派貨，冇錯喺佢哋手。呢單「貨到付款」惡搞嘅真正代價，最後落到一個人嘅安全同住所上面，笑到一半真係要收聲。
