河南洛陽一名患有高脂血症嘅女子，近日食咗一碟油膩豬腳，隨即腹部劇痛，被急送醫院搶救，其後入住深切治療部（ICU）留醫，診斷為急性重症胰臟炎。經救治雖然脱離危險期，但呢場大病令佢嘅體重由原本嘅85公斤急跌至僅剩44公斤，短短時間內暴瘦41公斤，幾近腰斬，個案喺網上引起廣泛關注。
南昌大學第二附屬醫院消化科主治醫生黃紫慶解釋，胰臟係分泌消化酵素、負責代謝脂肪嘅核心器官。患者本身患有高血脂，血液已堆積大量富含三酸甘油酯嘅脂蛋白顆粒，生理機能猶如處於極限超負荷運轉嘅機器，若再突然攝入高油脂食物，等同向失控引擎猛踩油門。臨床指引指出，人體正常三酸甘油酯水平應低於1.7mmol/L，一旦超越11.2mmol/L，急性胰臟炎嘅發病機率將急劇上升。
北京大學人民醫院副主任醫生陳國棟指，急性胰臟炎患者體重下降主要受炎症嚴重程度、禁食週期長短、靜脈營養支援程度及有否器官併發症影響。重症期間人體處於嚴重全身性炎症反應與極高代謝狀態，高燒及大量體液流失急速掏空體內儲備；加上發病初期須嚴格禁水禁食，生理機制唯有迅速分解自體儲存嘅脂肪與肌肉組織以維持基礎生命。
洛陽市中心醫院急症科副主任齊三利提醒，本身患有膽囊結石、膽道疾病或高脂血症嘅人士，必須嚴格控制血脂並定期覆診，日常每餐維持7至8分飽，切忌暴飲暴食及酗酒。若飽餐或高脂飲食後出現持續性上腹劇痛，應即時前往急症室求醫。
