內地小鎮做題家夫婦喺港買樓養BB，月入9萬但硬支出佔過半，每個月「月光」。網民有啲話奢侈，有啲感同身受。
日前有網民喺小紅書自爆：佢同老公都係內地「小鎮做題家」出身，喺香港安家立室，三口家月入 9 萬，結果每個月「1 分錢也存不下來」。佢話：「如果要吃那麼多苦才能存錢的話，那就不存吧。」
成個開支單出嚟真係一覽無遺：到手 9 萬，先預留 1 萬交税，供樓加管理費地租差餉 3 萬，水電煤上網 2,000。因為喺香港養車太貴，一家三囗買咗部車喺深圳，供車加深圳養車每月約 6,000，喺港搭巴士的士網約車再 1,000。飲食外賣煮飯加上同老公每週外出聚餐，每月 1.5 萬。
最貴係 BB：奶粉尿片衣物玩具每月 8,000，節日生日送禮攤 4,000，一季一次旅行攤 4,000，護膚衣物 3,000，再加貓狗糧食洗護 2,000。9 萬就咁全數榨乾，一分無。
PO 主後嚟補充：「省錢需要消耗大量時間與精力反覆格價，現階段寧願把開銷當成『生活的抗抑鬱藥』。」佢同老公都係小鎮做題家，考咗名校、辛苦衝刺先至買到港樓，過去一直「延遲滿足」，身心都幾近極限。佢話：「萬一哪天失業了，就回鄉下過躺平但清閒的生活。多愛惜一點自己吧～」
帖文一出，兩地網民即時吵翻：有網民批「每日餐飲 500 實在太奢侈」，有網民聯想到常陷財困嘅藝人張致恒，喊佢「富有版張致恒？」。但亦有網民表示共鳴，話「拋去税跟房貸，每個月生活費大約是 3.5w，算下來在香港很正常了」。有喺港有 750 呎無貸樓嘅網民更直説：「不願意在香港吃苦，果斷在內地。」
按統計處《綜合住户統計調查按季統計報告》，全港三人家庭住户每月入息中位數約 3.63 至 4 萬；呢個家庭月入 9 萬，收入遠超全港八成以上。而呢類家庭之所以淪為「高薪月光族」，分析指主因係固定負擔比率過重——供樓、深圳車、税，硬性支出已佔過半，遇到職場波動或加息週期，資金鏈承受巨大考驗。
姣姐講多句：呢單帖最癲嘅唔係「月入 9 萬都月光」呢個反差，而係佢用「抗抑鬱藥」三個字講出嘅嗰個「延遲滿足」——小鎮做題家衝咗二十幾年，買到樓、生到仔，到頭嚟仍然「1 分都存唔到」。呢句「多愛惜一點自己吧」，比成張開支單更刺眼。你覺得呢種「高薪月光」係浪費，定係一種被迫嘅自保？
