今年萬聖節（10 月 31 日）恰好落在星期六，配合旅發局首辦嘅「香港萬聖月」，一連三個星期六會喺中環、啟德、蘭桂坊、旺角及尖沙咀有多場 Cosplay 街頭派對。南瓜燈、骷髏橫幅隨處可見，全城狂歡氣氛已經拉滿。
正當萬眾籌備「扮鬼」嘅節骨眼，台灣命理師柯柏文近日喺個人 Facebook 專頁撰文「特別提醒」：萬聖節變裝原來都有大忌，仲點名唔好扮「一類造型」。佢話，每逢農曆七月「中元節」大家都對鬼驚怕、處處避忌，一轉眼十月底西方鬼節卻人人興致勃勃扮血淋淋鬼怪，呢個反差「頗為矛盾」，並質詢大家要否無批判全盤接收外國鬼節文化。
佢又從傳統民俗「取象」嘅角度出發，話平日拜神求平安，過節時卻刻意追求陰森血腥，「顯得頗為矛盾」；想小朋友過節，揀可愛卡通或童話造型一樣得，未必要盲從把小朋友扮成恐怖片主角。
佢又「特別引用」《易經》「節卦」，引《雜卦傳》「節，止也」、《節卦・彖傳》「節以制度，不傷財，不害民」，提醒人過節要有規矩、花費要有分寸；買變裝衫「量力而為」、飲酒「切忌失控」、出入人多地方要留意動線。引用《易經》「苦節不可貞」之後，佢再補一句：「最重要係喺該停嘅時候停下來。」
圖片：Toby Ord／CC BY-SA 2.5／Wikimedia Commons
安全方面，柯柏文重提 2022 年 10 月 29 日韓國梨泰院嚴重踩踏悲劇，提醒看到狹窄入口已經塞滿人潮，「絕對唔好盲目硬擠」；帶小朋友要「先看清緊急出口」，變裝服飾「不要遮擋視線或過長絆腳」，更唔好為拍照打卡「拿生命作賭注」。
至於「討糖」，佢話「不給糖就搗蛋」只是一句玩笑，有人給糖要誠摯道謝，對方未準備好就唔好鬧事。節日「開心拿到糖、三五知己聚在一起打卡聊天，其實已經足夠」，時間到就「早點回家，洗個澡、換下衣服」，「切忌為追求盲目狂歡而弄得筋疲力竭，甚至讓自己置身險境」。
姣姐講多句：命理師用《易經》「節卦」勸人「過節要識收」，聽落係假正經極嘅老派講法，但細心睇，「節，止也」四個字，講嘅真係「玩到時候要識收手」。真係想扮鬼，扮得安全、扮得有分寸就足夠。再講一次，梨泰院嗰個夜晚，唔係擺出恐怖造型就該被嘲笑嘅笑點，唔好將悲劇當素材。
黃姣姐整合｜頂硬上
