巴黎時裝周前排，本應該係時尚界最頂級嘅戰場，點知今次平野紫耀要經歷嘅，係一場真槍實彈嘅「生存挑戰」。

近日，現年29歲嘅日本男星平野紫耀——現為Number_i成員、前King & Prince靈魂人物——以品牌大使身份獲邀親臨巴黎時裝周男裝騷，坐喺星光熠熠嘅前排。據現場流出影片，佢個鄰座，正正係澳洲男星Josh Heuston，曾參演電影《雷神奇俠4：愛與雷霆》同Netflix熱門劇《心碎高中》。

呢位大佬坐姿豪邁，雙腿大張，幾乎霸佔咗半邊座位；反觀平野紫耀，被擠得只可以夾緊雙腿、縮成一團，畫面既無奈又尷尬。

但真正嘅「重創」，來自鼻子上嘅。影片顯示，平野紫耀先係緊鎖眉頭苦苦忍耐，疑似難耐鄰座身上皮革衣物、古龍香水同汗水交織出嚟嘅濃烈味道。當Josh抬手向佢方向移動，平野先係斜眼偷瞄，隨即秒速用手緊捂口鼻，眼神渙散呈呆滯狀態，全過程被鏡頭直擊。

片段自十月初喺網上瘋傳，大批網民笑爆，笑佢「表面睇騷，實則魂魄早已離體」😂 做個講表情管理嘅頂流偶像，呢一刻真係救唔返。

姣姐講多句：表情管理係偶像嘅飯碗，但鼻竇唔聽大腦。頂流男星喺時裝週中途破功，呢個反差先係時尚界最真實嘅「適者生存」——靈魂想睇騷，鼻子想返屋企。

黃姣姐整合｜頂硬上