《俠盜獵車手 VI》（GTA 6）預計11月19日上市，標準版79.99美元，終極版99.99美元，定價比過往不少3A大作都貴，令消費者好肉赤。英國百萬富豪蒂爾伯里（Mark Tilbury）2日喺社交媒體X上傳一段影片，認真分析點解花99.99美元買GTA 6係一筆「划算投資」。
Tilbury喺YouTube有超過930萬訂閲，成日分享商業秘訣。佢嘅邏輯係咁：GTA 6通關約80小時，每小時成本約1.25美元；如果計上探索開放世界嘅額外時間，每小時仲可以降至0.5美元。再假設每晚打4小時、共50個晚上，對齊現實中「一個晚上去酒吧花100美元」嘅開支，買遊戲實際上幫人省下約5,000美元（約3.9萬港元）。
硬蕉抽兩句：呢個「打機慳錢大法」就係一條典型富人數學。佢話你打機省錢，前提係你每晚會去酒吧花100美元。對大部分香港打工仔嚟講，「一個晚上花100美元」嘅生活，基本等同攞到金卡先至會發生嘅事。呢種「投資回報率」話術，同舊公司話你加個夜班就慳咗外判費、放個長假就慳咗機票，同一個帳法。
GTA 6 11月19日發售，機迷可以買、唔買都得，但「玩50個鐘慳4萬蚊」呢個説法，硬蕉哥建議大家當成一個方便嘅自我説服藉口就得，唔好真係計埋落個財務報表。
硬蕉哥整合｜頂硬上
