61歲嘅前TVB當家花旦曾華倩，近日喺微博傳了一張「生圖直出」嘅近距離素顏自拍，無濾鏡、無修圖，大方展示無添加狀態，即日喺網絡惹來一片熱議。
相入面佢戴住米黃色針織漁夫帽，手執一樽紅豆冰。雖有簡單黐咗假眼睫毛，但雙眼仍略顯疲態、眼袋明顯、眼睛看似細咗，不過肌膚依然有自然光澤、非常緊緻。佢喺帖文寫道：「最愛的紅豆冰但走三冰！原因我不喝冰和凍的飲品多年！你們呢？」順手揭咗自己多年唔飲冰凍飲品嘅養生秘訣。
除咗紅豆冰自拍，曾華倩又上載了一張熒幕嚴重爆裂嘅手機截圖，無奈大吐苦水：「真的對我説...每年年尾左右我的手提電話，一定有些問題出現，要去店裏弄一弄」，意外曝光咗手機桌布——原來係佢年輕時嘅大頭相，滿載青春回憶。
呢張毫無掩飾嘅照片曝光後，網民評價好壞兩極。有網民見慣明星精修照，直稱被嚇到：「這個照片有點恐怖 哈哈哈哈哈哈」；亦有大批網民出聲力撐，讚佢唔依賴美顏濾鏡，做到真正「優雅地老去」，留言「姐姐素顏皮膚好好」、「皮膚真好」、「帽子可愛，姐姐更可愛」。
曾華倩近年過住寫意半退休生活，鮮少公開露面，今張「無添加」照反而成為佢近月最受矚目嘅網絡事件。
姣姐講多句：61歲仲敢傳無濾鏡大頭相，仲敢公開發聲「我飲紅豆冰」，呢種「斷崖式不老」嘅底氣，好多年輕網紅見咗都無話。最靚嘅保養秘訣，原來真係「唔飲冰」咁簡單。
