11月1日播嘅TVB節目《女神配對計劃2》，本集安排一眾女神配合同「求愛勇士」喺泳池打「騎膊馬」，最將對方推跌落水即為勝出。以為係搞笑節目，點知一出水就出咗兩單「意外」，一單搞紅條頸，一單搞紅舊情人。
首輪陳星妤（Yvette）同Oswald對陳若思（Amber）同阿朗。鏡頭見Amber使盡力都推唔贏，面部已經冇表情，而陳星妤仲係不停箍頸、出盡力拉Amber落水，最後成功將對方撳落水池。其後Amber上載當日花絮，頸上掛住一條紅紅抓痕，好幾位網民被嚇到，批評陳星妤「狼死狠毒及非常暴力」，話工作人員見狀應該即刻叫停，稍不慎隨時搞出事。
去到最後回合，陳星妤配Ice（俞鋆瑞），同何沛珈配李爾晨、俞可程配Tony大混戰。陳星妤竟然以一敵二，將俞可程同何沛珈先後推落水。Ice事後直言呢場見到兩女性格好唔同：何沛珈內心軟綿綿，星妤就心唔太軟。
資料圖片：Pixabay
最狠嘅梗唔係喺泳池，係喺岸上。賽程期間Ice主動幫陳星妤按摩鬆骨，而喺旁睇住嘅郭珮文（Juliana）——Ice嘅前度女友——面色大變。上一季女神羅毓儀（Yuki）察覺異樣，主動問郭珮文感受，佢坦承：「之前拍拖嘅時候，都有遇到安全感同界線嘅問題，會令我呷醋同有唔舒服嘅位。」但隨即又為Ice辯解：「係我嘅問題，我覺得我比較 flexible，我嘅邊界感可以隨時隨住佢。」花生團聽完都好着緊，勸佢唔好一味忍受。
郭珮文事後受訪講晒心聲：「之前同 Ice 都有摩擦，我會諗係咪自己無理取鬧。今日大家話俾我知其實呢樣嘢係 OK 喎，我可以介意，唔可以我一個人承受晒所有唔開心。」
Ice喺旁則大方回應：「説實話，我對 Yvette 只是朋友，我當時只是在想，如果我可以幫她 recover 好，那我們就可以贏到比賽，這就是我的目的。」又話：「我對女生朋友是真的很好，I have love for them。」——意思係天生對所有女仔都有愛，冇得㨰。
姣姐講多句：呢個節目表面上賣「求愛」，實則每集都出「意外」。最狠嘅梗唔係泳池，係前度女友喺旁睇住男方幫新女神按摩，仲要「有愛」咁講。愛有界線，按摩可以，「I have love for them」就唔好照住播。黃姣姐整合｜頂硬上
