日前，劉鑾雄（大劉）同太太甘比（陳凱韻）現身細劉（劉鑾鴻）旗下雙子匯（The Twins）開幕活動。甘比行喺現場，竟然撞正有份參演《愛·回家》嘅無綫綠葉夫妻檔——楊證樺同沈可欣。不過這一次，佢哋唔係入屋拍劇，而係身穿全黑制服、戴住通訊耳機，親力親為落場執行安保任務。
原來楊證樺同沈可欣近年除咗幕前演出，仲開咗一間保安公司，以前已經以老闆身份監過場國際七人欖球賽同謝霆鋒演唱會呢類大型活動，今次就輪到喺雙子匯親自動手。
甘比即刻把握機會拍張合照，仲喺社交平台出帖打氣：「今日在The Twins，估唔到會撞到『愛回家』的成員，開了保安公司，兩夫婦一起工作，十分funny。」跟住更「認讟」爆料：「大家都知道邊個日日追啦…答案有獎…係大劉」，大方公開老公大劉原來係《愛·回家》嘅忠實粉絲，天天都追。沈可欣隨後轉發貼文，多謝甘比支持：「多謝支持愛回家！我哋會繼續努力！」
楊證樺同沈可欣結婚多年、育有兩子，一向係圈中模範夫妻。沈可欣喺《愛·回家》飾演威龍百貨保安部主管「葉碧嘉（Rebecca）」，演技備受肯定，近日更再亮相《三代同糖》繼續入屋。
姣姐講多句：想知點解會係《愛·回家》，諗下都合理。大富豪屋企電視枱，唔使開到幾高清，入到幾多頻道，日日打開多數都係《愛·回家》——因為成個屋企都係《愛·回家》。大劉坐喺大屋嗰把喺度，日日追平民劇，呢個反差才係真·笑點。
