廣東佛山燈湖西街夜市近日發生一宗消費糾紛，鬧到要停業道歉。一名女顧客喺手作檸檬茶攤檔花18人民幣（約21港元）買咗1杯鮮果茶，付款後喺攤檔附設座位坐低飲茶，點知剛喝第一口，店員就衝過嚟話「單人必須點2杯飲品先准入座」，逐佢走。
按事主喺小紅書嘅講述，嗰陣攤檔四周仲有好多空桌，完全冇排長龍，亦冇座位緊張。從下單到飲品做齊，工作人員全程冇提過乜「入座門檻」。茶已經喝咗飲唔返、退唔到，事主唯有離場。佢事後憤怒，指如果提前講有呢條規則，自己絕對唔會光顧，直斥店方存心瞞騙。
呢個「隱形低消」一經曝光就喺網上爆炒，大批網民批攤檔「欺客」、「吃相難看」。燈湖西街夜市管理公司接投後查核，喺11月4日發公告，證實攤檔私自設最低消費，違反街區管理公約——守則明列公共座位同攤位附設座位都唔可以設低消，唔可以將消費額度當入座前提。
管理方已勒令攤主向事主誠懇道歉，並罰呢間檸檬茶檔喺11月3日至5日停業整頓3日，要整改完通過驗收先准開返。夜市仲會全面巡查、加設入座規則提示牌同開通投訴途徑。湖北謙牧律師事務所律師邵鑫垚指，顧客買1杯飲品已係合法正常消費，事後強迫多買屬「變相設最低消費」，侵犯消費者知情權同公平交易權，違反《消費者權益保護法》第9及10條。
姣姐講多句：買嘢唔准坐、唔買第二杯就係「唔夠格」？呢啲規矩唔喺收銀台話明，俾人坐低飲一啖先出嚟「罰」，就等於先畀客上枱先收「入場費」，係最典型嘅吃相。夜市管理方處理得快，停業加道歉，都算難得。
黃姣姐整合｜頂硬上
