開學不過幾個星期，學界各方都仲喺摸索新學年嘅節奏，忙亂之中少不免有甩漏。一位港媽近日喺 Threads 發文，話囡囡返學忘記帶計數機，班主任得悉後，冇寫手冊、冇扣分，反而要求佢喺白紙上「畫返部計數機出嚟」。呢個處罰方式一出，即喺網上惹起熱列討論。
做媽媽嘅大感唔係味，索性將囡囡親手繪畫嘅計數機「作品」直接上載，公諸於世，配文怒問「有咩意思呢？」。喺佢睇嚟，呢個處理根本唔痛不癢，卻又講唔出邊度錯。
帖文一出，網民意見馬上兩極化。一眾人支持發文港媽，認為班主任此舉屬「小事化大」，留言直斥「擺明係服從性訓練」、要「立即向校長投訴」，有人更以「教蓄」形容呢種做法，質疑懲罰背後的實際意義。
另一邊廂，就有網民覺得發文者對囡囡過分保護、大驚小怪，直言「等你個寶貝女下次記得帶囉，你真係唔識架喎」。有人更替老師抱不平：「咁都叫罰&侮辱？死啦而家啲家長究竟點教細路架？好恐怖，而家做老師壓力真大。」亦有網民從實際角度出發，指喺學校畫一幅「當係 mark notes」都可以。
最搞笑，係有網民將呢件事同尋人啟事聯想，笑稱「同尋人啟事一樣，等佢返屋企，屋企人幫佢揾」。
硬蕉抽兩句：開學初大家都亂，忘帶嘢係常事，呢幅計數機畫得幾認真都係另一回事。不過「罰學生畫返件遺失嘅嘢」呢個邏輯，就真係叫人摸不著頭腦——畫部計數機又唔會喺空中飛返嚟。最緊要係家長同老師互相傾嚇，唔好一有分歧就「公審」。
硬蕉哥整合｜頂硬上
