美國監控公司 Flock 嘅 CEO Garrett Langley 喺私人警察會議上嘅講法，被漏音曝光，內容耐人尋味。
呢單漏音出自 10 月下旬喺佛羅里達州 Orlando 舉行嘅 International Association of Chiefs of Police（IACP）警察會議，有超過 16,000 名公務人員官員出席。場內有場 Langley 同 IACP 主席 David Rausch 嘅「fireside chat」，大綱寫住要探討 ALPR 技術嘅私隱、透明度、數據使用同社區信任等議題。
但 Langley 喺場上嘅講法，同大綱寫嘅完全兩回事。佢指全美國對 Flock 嘅抗議「唔算真嘢」，話街上有嘅示威「系同一班人、同一啲牌、同一句口號。呢個唔正常，完全唔系自然。」更勁嘅係，佢聲稱網上對 Flock 嘅批評係由俄羅斯 bots 主導，話社交媒體相關討論「由七月至今跌咗約 95%」，又搬出已證實唔成立嘅「烏克倫炸俄羅斯數據中心會影響 bot 活動」理論。
圖片：MilesHigher／CC BY 4.0／Wikimedia Commons
就當佢公司產品嘅爭議：Flock 嘅自動牌照讀取系統（ALPR）唔斷掃描每輛途過車輛嘅牌、色、廠牌同車款，建立帶有時間戳嘅行蹤記錄。過去 18 個月已有數十個城市同 Flock 取消合約。而佢嘅數據係交俾執法客户査詢，客户連手令都唔使攞。
最「有記憶點」嘅一句：Langley 稱「我老婆話，你永遠都唔好道歉」，並話「過去九年犯咗好多錯，今個夏天犯咗好多錯。但我哋做嘅係好嘢。」
此前 Langley 曾經就將追蹤 Flock 攝影機位置嘅組織 DeFlock 稱為「恐怖主義組織」一事向媒體道歉。此次漏音曝光後，佢喺場上表示「唔想再同媒體做訪問」。
（姣姐講多句）一間賣街角監控、攞你行蹤數據嘅公司，高層面對抗議嘅第一反應係「呢啲唔算真嘢」，第二反應係「老婆話唔好道歉」——呢個係成年人世界嘅真實寫照：做錯嘢唔係問題，做錯咗仲話「唔算真嘢」先係問題。
