每次搭機選位，有人鍾意窗位、有人鍾意走道位、有人搶頭排想早落機。但如果你最緊要是「少啲細菌」，有冇想過，答案既唔係頭排、都唔係尾排？
美國旅遊媒體《Travel + Leisure》訪問咗多名航空業人士，其中一位不具名嘅美國西南航空（Southwest Airlines）空服員指出，如果你望住機艙配置同乘客走動路線，機艙中段其實係接觸病菌機會相對較少嘅位置。
點解係中間？聽佢解釋。多數飛機嘅廁所設喺機艙前後方，後頭通常仲有較大嘅廁所，使用頻率較高。前頭則係乘客登機嘅主要入口，成批人集中喺同一度。中間就冇呢啲「人流黑點」，所以相對少啲細菌累積。佢同時講明，呢只代表「相對少」，唔代表零風險。
同一篇報道仲提咗一個少人知嘅位：機上廚房。有多年航空業經驗嘅貝文（Craig Bevan）話，廚房因為空服員要喺度備餐、飛行期間要持續抹工作枱面，所以係機艙入面維持得較整潔嘅區域之一。
不過空服員提醒，清潔頻率方面，機組人員多數視實際狀況整理，只有廁所嚴重髒污或壞咗先會處理；真正徹底的清潔，係由地勤人員喺航班之間做。
至於「機艙密閉、空氣會積細菌」呢個民間傳説，前商用飛機機師史密斯（Patrick Smith）否認：現代客機嘅空調係混合新鮮空氣同過濾循環空氣，並定期更新機艙空氣。佢建議，與其計較坐邊排，不如留意經常接觸嘅扶手、桌板同椅背置物袋，適當用消毒濕巾抹抹，同埋留意身邊有冇病嘅乘客。
姣姐講多句：下次開工出差、搶機位，唔使再問同事「頭排定尾排」，直接話「我要中間」。呢個唔係玄學，係人流分佈學。想更乾淨，就係帶幾片消毒濕巾喺度，唔好成日摸扶手。
黃姣姐整合｜頂硬上
