MIRROR「FING小組」隊長Lokman（楊樂文）、副隊長AK（江𤒹生）、Alton（王智德）同Frankie（陳瑞輝）昨晚（31日）喺萬聖節音樂嘉年華又唱又跳，完場仲high爆落台派小禮物。Lokman指今次表演都可以講係為12月演唱會預演攞氣氛，問到邊個時間最難夾？四人齊聲「個個都忙」。
Alton就早前喺訪問時講笑失言、惹網民批評一事首次正面回應。佢話當日「冇惡意」，同訪問過多次嘅記者好熟，「冇諗過隔咗一晚就變咗軒然大波」。最勁係佢形容嗰次係「實驗嚟嘅，今次係實驗失敗」，被問會唔會放棄幽默？佢答「我覺得唔可以放棄嘅，但要小心」，仲笑言有朝再見到該記者會出聲講聲唔好意思。AK更喺一旁自責：「大家可能撈埋一齊嚟講，我覺得反而係我影響到佢就真！」
FING四人組仲要面對一單尷尬事：四人全部冇出席隊友邱士縉（Stanley）嘅婚禮，只係因工作關係。Lokman話Stanley出發前有遇到，已「一早送咗份心意，等佢帶住份心意過去」，又笑言今日簽名會係Stanley做人夫後第一次同佢哋見面，問到會唔會補餐？佢哋話「等主人家去諗」。
另外Alton話喺團綜公主抱姜濤時「爭啲椎間盤突出」，又指想抱起姜濤只有隊友Jer（柳應廷）頂得到；問到田啟文笑指他喺《我們不是什麼》係「降呢打壓」，AK否認，話譚耀文先係主角，自己由頭到尾都係男配角。
姣姐講多句：「實驗失敗」——Alton呢個講法，真係想道歉定真係想搞笑？FING四人集體缺席自己band member婚禮，仲喺台上當住記者面講緊，呢個就係MIRROR世界嘅日常。想再試？記得小心，下次「實驗」唔好再失敗喇。
黃姣姐整合｜頂硬上
