日前，現年53歲、1990年亞洲小姐冠軍吳綺莉（Elaine）罕有作客HOY TV訪談節目《九運會客室2》，與主持伍詠薇、李凱賢（Brian）就未婚產女嘅往事、母女關係及近年嘅網上謠言，做咗一段罕見嘅深入剖白。
先澄清「驗DNA」傳聞，拒絕寄望他人
早前網上有不少匿名帳號，刻意造謠指她「私生活混亂」，甚至宣稱佢當年被要求為女兒做親子鑑定。吳綺莉喺節目中直斥呢啲係「博流量」嘅謠言，斬釘截鐵表示：「第一，無人叫過我做呢樣嘢啦！第二，我真係唔係（私生活混亂）囉！」佢話，自己起初選擇清者自清、不予理會，未料沉默反令失實內容不斷蔓延，所以已將相關侵權內容全權交由內地律師循法律途徑追究。
當被問及卓林生父有冇出過任何經濟支援，佢冇猶豫，直接斷言：「冇喎，從來都冇喎！」吳綺莉話自己向嚟習慣靠自己，「我唔會坐喺度諗邊個會幫我，我會諗自己點樣幫自己」，「我由細到大自己一個，真係自己長大」。
護女心切，絕口不提生父恩怨
最耐人尋味嘅，係佢解釋點解從來冇喺卓林面前提及生父。佢話源於自己5歲時父母離異，當年全枱親戚飯桌之間嘅冷嘲熱諷，至今仲深刻烙印喺心頭。佢認為大人恩怨唔應該複製到下一輩，「一負面，就唔好講，掉開佢」。當伍詠薇追問有冇被要求墮胎／不要個孩子，佢以保護女兒為由，明確拒談。
母女關係「昇華」，自己養自己
吳綺莉話，大約喺卓林2歲時，佢帶女離港，獨自喺上海照顧女兒，甚至為此犧牲演藝事業。佢形容而家母女關係「昇華咗」，「一個更年期，遇著一個反叛期，撞埋一齊，點搞呢單嘢」——「哇，真係爆炸」。
現時卓林喺海外獨立生活。吳綺莉話過去兩年冇畀過任何金錢佐助，「佢都無靠任何人，自己生活，自己養埋自己屋企」，佢對此感到十分驕傲。提到卓林早年出櫃並喺海外與外籍同性伴侶 Andi 結婚，吳綺莉話對於「新抱」唔會多作評論，對兩人感情抱持「自由發展」與尊重態度，只係最重要嘅係人品良心。
黃姣姐整合｜頂硬上
