電影《我阿爹想旅行》，張家輝、鍾雪瑩主演，黃綺琳、黃鐦聯合導演，上映三星期票房去到1300萬港元，叫好叫座。點知特效總監梁仲文上載條片出嚟，話呢部看似「幕幕實境」嘅温情喜劇，背脊竟然由284個特技效果撐住。
温情片要有284個特效？仲比講虛擬世界嘅《觸電》都多一倍。梁仲文自己都話始料不及，唯一開心嘅係冇人發覺畫面有特效痕跡，即係話「做」得唔見「做」法。
車頂載大湯碗行港珠澳大橋嗰一幕，最荒謬。阿爹架車要載住道具碗行大橋，但就算喺香港行都要符合標準，行大橋就根本不可行，所以呢一幕基本上係全AI生成——温情片都靠AI兜底。
沖繩扯大纜嗰場面，因為現場人多混亂，怕入鏡路人或撞到人，最後喺現場只拍大環境畫面，其餘大部分演員近鏡都係綠幕前拍。澳門賭場嗰場更係「電子穿膠花」，每張賭枱小熒幕內容同劇情唔合，要人手逐個執，梁仲文笑言呢種深耕細作「可媲美發跡前李嘉誠先生」。
全片最難執嘅，竟然係兩父女同Ansonbean（陳毅燊）同周祉君喺金舖相遇嗰一兩秒。導演最後揀咗NG做正片，要執走周祉君；偏偏手提拍攝搖動，舖頭又反光，倒影同對面燈光變換全要重做。導演甚至提出容許有少少瑕疵，梁仲文話唔得，執到底。
姣姐講多句：以前聽人講「温情片賣温情，特效係好萊塢玩嘢」，呢度温情片284個特效，仲比科幻片都多一倍，港珠澳大橋靠AI「飛」過去。你話温情片係假㗎係咩？
黃姣姐整合｜頂硬上
