由AI歌手Meomuru（머무르）負責企劃、作詞及整體製作嘅《成為夢想中的大人了嗎？》，13日下午4點喺韓國主流音源平台Melon嘅TOP 100衝上第3名，寫下AI演唱歌曲罕見嘅高排名紀錄。
最 surprise 嘅係，呢首歌由頭到尾冇一個真人開口唱——全部聲線都係AI音樂生成服務「Suno」搞出嚟。呢首歌6月發行，原本冇乜水花，由9月開始默默爬榜，一路逆襲入前三，喺Melon榜上幾近前所未見。
呢首歌點解會爆？歌名本身就係一個靈魂拷問，對住嗰班喺理想同現實之間迷惘嘅20、30世代，將「小時候以為長大就會好過」呢個集體記憶直接翻面——結果長大咗，不安同疲憊照追。歌曲留言區滿住就業、職場、經濟壓力嘅吐真言，唔少人話「明明知道係AI唱嘅，但聽到就哭」，有人話被療癒，亦有人話比某些真人音樂「更對味」。
不過並非所有人買單。有網民就怒問：AI唱嘅歌同真人歌手嘅作品擺同一榜單比拼，公平嗎？要用同一套標準評價嗎？呢個爭論正在韓國網民之間持續發酵。
資料圖片：Pixabay
Meomuru喺Melon歌曲介紹寫道：「對我來説，AI是現代樂器，也是把我的想像一起變成現實的夥伴。我相信工具會變，但故事不會變。希望我的真心，能成為你們疲憊一天結束時温柔的停留。」
另外，由「朝鮮嘻哈」製作嘅《心之森》都擠入Melon TOP 100，顯示AI音樂喺韓國市場嘅份量正持續擴大。
姣姐講多句：呢件事最尷尬唔係聽眾哭定唔哭，係嗰班真人歌手要面對一個新現實——以前你嘅對手係其他真人，而家你嘅對手係一組代碼同一個prompt，佢哋24小時唔睡、唔喊、唔要royalty fee、唔會崩潰。Meomuru嘅「AI係現代樂器」講得好老實，但佢唔會講嘅係：當嗰把「樂器」開始喺Melon排到第3名，你仲以為自己嘅優勢係「真人有感情」？AI唱嘅歌可能冇心跳，但佢寫嘅歌詞精準到連自己都唔知係幾真。真人歌手要答嘅唔再係「點樣唱得好過」，而係「點樣做到AI做唔到嘅嘢」——例如親身出頭、喺演唱會流汗、同歌迷對視一眼。呢樣嘢，機器暫時學唔到。
黃姣姐整合｜頂硬上
