最近又係食長腳蟹嘅旺季，不過食貴價海鮮最怕就係被不良商家「掉包」——秤完重入廚房清蒸，端出嚟已經換成另一隻平價蟹。有網民就於 Threads 分享上水一間酒家食蟹經驗：食前拍照、再扭斷一隻蟹腳做記號，上枱後逐隻比對，最後證實自己嘅蟹未被調包。
單據相片顯示，佢哋一行喺上水一間酒家點咗一隻78兩、以每兩14.3元計算、總價1,115.4元嘅清蒸阿拉斯加長腳蟹。帖文寫住「Threads學到真嘢，去食長腳蟹要影相＋斷腳（對唔住啦，蟹）」，仲自嘲：「我淨係扭少少，有啲人扭成隻腳。」上枱後逐腳對照片核對，最後無事。
圖片：Gillfoto／CC BY-SA 4.0／Wikimedia Commons
帖文一出，引來網民熱烈回應。有人認為大酒家「咁大間嘢邊會特登搞換蟹」，最多係蒸錯蟹；亦有曾試過被掉包嘅網民表示，試過幾次俾人換蟹之後，會照樣拍照扭腳求安心，甚至有網民話寧願自己買返屋企慢慢食。
另有網民憂心「連膠牌蒸」可能有食安風險，建議酒家最好係每隻蟹磅好貼上價牌任揀，蒸完價牌仲喺度。
姣姐講多句：「影相＋扭腳」呢招聽落係多此一舉，但講真，被掉過包嘅人會話你癲；食蟹嘅快樂，就係要食得安心，無謂同商家計較「咁大間店會唔會換蟹」。不過「對唔住啦，蟹」呢句真係笑到我出聲。
