《璀璨之城》係現年53歲「不老男神」張智霖（Chilam）事隔13年再拍嘅無綫劇集。張智霖喺演藝圈活躍超過30年，同太太袁詠儀（靚靚）一向係圈中吸金力極強嘅模範夫妻，不過近年明顯減產，甚少接劇。呢個「減產」原因，就係佢舅父、昔日「三級片皇帝」曹查理大爆。
曹查理今年5月接受汪曼玲嘅YouTube節目《快拍．曼鏡頭》訪問時透露，張智霖曾向佢坦言對演藝事業感到有啲意興闌珊。作為長輩，曹查理便開導：「我同佢講，如果你揾嘅錢係夠你三世用，就揀嚟拍，如果唔夠就要搏命。所謂嘅三世，就係你自己洗一世，你個仔洗一世，到你個孫都洗唔晒，呢啲就叫三世。」結果張智霖答一個「夠」字，曹查理便話揀自己鍾意嘅工做就得，唔使再受氣，張智霖亦十分認同。
翻查資料，張智霖同袁詠儀多年來累積咗驚人身家，房產商舖係基本盤，張智霖仲有投資名畫，連袁詠儀嗰啲極度稀有嘅愛馬仕（Hermès）手袋，相信都係屋企嘅資產。
曹查理喺同一訪問仲提及張智霖同袁詠儀嘅兒子「魔童」（張慕童）。魔童熱愛音樂，尤其鍾情木結他，原本去英國讀書，袁詠儀第一時間陪過去照顧生活，張智霖更喺學校附近買咗一層樓畀仔住。不過魔童喺當地住咗一年，就決定去美國紐約拜師學木結他。
姣姐講多句，身家「三世無憂」嘅張智霖，仲要回巢幫TVB攞工，呢種反差本身就係最大笑位。有錢到三世都洗唔完仲幫台寫劇本，呢班「金主返巢」對TVB嚟係真係有嘢睇。
黃姣姐整合｜頂硬上
