廣東惠州一位朱女士，就因為自己養咗隻貓，險些送命。10月14號下午，有陌生人到訪，6歲大、重約13磅的愛貓受驚，被朱女士抱起時突然用後腿猛蹬腹部。朱女士話當時只見到肚子上有2道抓痕，隱隱作痛，以為冇事。
誰料到翌日凌晨，朱女士因下腹劇痛痛醒，情況急轉直下。家人隨即將她送往惠東縣人民醫院。親人表示：「打止痛針、做CT，然後直接進了手術室。」
經腹腔鏡探查手術，醫生從朱女士腹腔及盆腔清除約1,000毫升積血及血塊，再切除及修補囊腫，期間輸了2個單位同型濃縮紅血球及400毫升血漿。最終確診右側卵巢黃體囊腫破裂，經留院觀察至10月18日康復出院。
圖片：Karin Langner-Bahmann , upload von Martin Bahmann／CC BY-SA 3.0／Wikimedia Commons
惠東縣人民醫院婦科主治醫師周惠潔解釋，卵巢黃體囊腫係女性排卵後形成嘅生理性結構，到月經週期後半段，囊腫會增大、表面張力升高，質地較脆弱，此時若腹部受到外力撞擊，極易引發破裂大出血。周醫生建議女性在月經後半週期應保護好腹部，避免寵物踩踏或跳上腹部，避免劇烈運動，避免大便時過度用力，性生活動作要輕柔。
美國克里夫蘭診所（Cleveland Clinic）資料指出，黃體囊腫一般無害、無痛，通常不需治療，會在排卵後數星期內自行消退。只有少數個案會出現囊腫破裂、出血流入腹腔，或令卵巢扭轉。出現嚴重盆腔痛、持續噁心嘔吐、頭暈乏力，或單側腹部出現刺痛，就應盡快求醫。
姣姐講多句： 你以為你貓平時踩你兩腳係「貓生」，原來真係會踩出人命嚟。下次你貓跳上你肚企，你最好即刻坐低做個CT。月經後半週期嘅女生，記着對你隻貓温柔一點，唔好俵佢踩你肚。🐱
黃姣姐整合｜頂硬上
