2026年8月29日，一輛車身貼住食品運輸公司標誌嘅貨車，由加州奧克蘭（Oakland）出發，載住6個棧板、總申報價值約1,140萬美元（約8,900萬港元）嘅英偉達（Nvidia，又譯輝達）AI晶片同其他電腦硬件，目的地係德州沃斯堡（Fort Worth）。呢批貨南下途中，喺南加州聖貝納迪諾縣（San Bernardino County）「連車帶司機」消失。奧克蘭警察局到9月13日先收到竊案報告，至今冇人被捕。
老練手法：警方事後追蹤發現，貨車失蹤前曾多次停靠，每次時長達數小時，判定係預謀成熟練嘅賊團所為。報告拖到9月初先入系統，等賊人有足足數日時間帶貨走人。
點解呢啲晶片咁「肥羊」：伯克萊大學 Haas 商學院教授 Olaf Groth 指，呢類晶片喺海外賣得約美國國內價嘅兩倍——一塊喺美國約55萬美元，出海就變100萬美元以上。有專家更提，先進算力晶片流入黑市，係潛藏嘅國家安全風險。
圖片：Coolcaesar／CC BY-SA 4.0／Wikimedia Commons
呢單仲係近期一串AI硬件大案入面嘅一單：9月，加州 Newark 一間倉庫有賊偷走貼住 Nvidia 同 PlusAI 聯名標誌嘅半連結車，以為開門就係天價 GPU，結果車廂入面實住4萬磅沙子。
硬蕉抽兩句：一塊晶片，美國牌價55萬，流出海外就變百萬；出口管制禁住「官方」賣，黑市照樣有價，仲貴一倍。AI晶片越禁越貴，越貴越值錢，越值錢越有人扮食餸車偷你。賊人扮食品公司偷晶片，美國「友岸外交」扮盟友送晶片——兩個都係「牌」出，一個假，一個都假。
硬蕉哥整合｜頂硬上
