韓國釜山北港親水公園一隻約3米雌性灰色真鯊「布康伊」，9月18日困入人工水道至今逾20日，近日被發現吻部擦傷，專家指疑係夜間遭遊客強光照射受驚掙扎，撞上水道設施所致。
一隻大概3米長嘅灰色真鯊，喺人工水道入面被幾支強光手電筒照到受驚、掙扎撞牆——呢個畫面聽起嚟好似某條癲片橋段，但真係發生喺韓國釜山。
「布康伊」（부캉이）9月18日首次出現喺釜山北港親水公園嘅人工水道，之後當局兩度試過將佢送回大海都失敗，佢就咁留低，一留就留咗超過20日。隨住佢成為城中癲聞，前往前往探佢嘅累計遊客人數甚至突破100萬人次。
不過近日情況出現轉機。韓國國立水產科學院10月7日透露，研究人員喺「布康伊」吻部附近發現疑似刮傷嘅傷口。專家推測，近期一段喺社群媒體流傳嘅夜間影片顯示，有遊客以強光手電筒照射水道，鯊魚疑似受燈光刺激後劇烈扭動、奮力掙扎，過程中撞上水道設施而受傷。官方指目前佢游泳狀況尚未出現明顯異常。
專家提醒，雖然傷勢暫時未至於造成重大影響，但如果反覆受傷，可能增加感染風險、令健康狀況惡化。釜山市政府其後決定短期內以持續觀察為主，而非積極展開救援，並會懸掛告示，呼籲市民避免以手機燈光等直接照射鯊魚。
釜山市長田載秀亦稱正密切關注近期水温下降、以及「布康伊」嘅覓食同游動模式，指最近冇發現佢覓食跡象，亦冇喺整條水道來迴游動，而係喺特定區域反覆出現。
韓國海洋水產部及國立水產科學院10月8日確認，「布康伊」係一隻體長約3米嘅雌性灰色真鯊；灰色真鯊已被國際自然保護聯盟（IUCN）列入紅色名錄「瀕危」等級，但並未列入韓國《海洋生態系保護及管理法》嘅海洋保護生物。
硬蕉抽兩句：一隻瀕危物種被困喺淺水道20日，全港——唔，全釜山100萬人次到場圍觀，仲有人舉住手電筒照佢。動物展示場嘅光線管理同動物福利標準，真係值得好聽。
硬蕉哥整合｜頂硬上
