全球擁有最大象群嘅南非洲國家博茨瓦納，本週三（2026年9月30日）舉行獨立60週年全國慶典，首都哈博羅內（Gaborone）舉辦嘉年華、文化表演、音樂會同體育活動。不過呢場「國慶宴」最勁嘅菜式，竟然係政府特批獵殺23頭大象提供嘅獸肉。
環境及旅遊部發出嘅許可證，授權獵殺23頭大象及其他野生動物，文書上寫住係為「慶祝用途」。呢個安排一出，即引來保育團體同當地居民批評。
博茨瓦納本土大象保護協會主席 Oaitse Nawa 警告，政府授權為慶祝擺宴而殺象，會令「有政府批准嘅殺象」被視為可接受，從而鼓勵偷獵、削弱保育工作。Nawa 又指，大象因不斷被槍聲趕逐而失去社會結構，需要更大保護。
西北部旅遊城市 Maun 嘅長者 Tshenatshe Monwela 批評，社區應該分到嘅係水牛，唔應該係大象；大象有獨特嘅文化同生態意義，博茨瓦納向來以保護野生動物同農畜聞名，呢段歷史角色應該喺政府分配慶典肉食時得到認可。
適逢口蹄疫（FMD）正在當地爆發，當局已推出遏制措施，有網民對喺疫期間食用野生獸肉表憂慮。
硬蕉抽兩句：一個以「全球最大象群」自豪嘅國家，獨立60週年嘅紀念菜式竟然係「大排檔式」殺象宴，仲要掛住「慶祝用途」嘅招牌。以「慶祝」之名行殺害保育物種之實，呢個雙重標準，連大象都頂唔順。
