成人題材｜18+
11月1日凌晨，前日本知名AV女優、現轉型做DJ嘅濱崎真緒（藝名：DJ Mao），喺尖沙咀夜場工作期間疑遭人「落藥」，送院後驗出其體內對4種藥物呈陽性反應，須入深切治療部（ICU）留院。
呢種事唔係笑話，亦唔好當「咁倒霉」一筆帶過。GHB（γ-羥丁酸，俗稱「迷姦水」、「G水」、「聽話水」）同FM2（氟硝西泮，俗稱「十字架」、「羅眠樂」）呢類中樞神經抑制劑，可能呈澄清、無色、無味、無臭嘅液體，容易溶入飲料，人肉觀察根本察覺唔到。GHB使用後約15分鐘可能出現不良反應；FM2有鎮靜、催眠作用，可引致嗜睡、反應變慢同記憶受影響。喺香港，GHB及FM2自2001年10月起已納入《危險藥物條例》附表1，等同海洛英、可卡因，販運及非法製造最高可判終身監禁及罰款500萬元。
圖片：sj／CC BY 4.0／Wikimedia Commons
台灣營養師高敏敏早前喺facebook發文提醒：被下藥未必一開眼就「知道」，好多人會誤以為自己「不過係喝醉咗」。佢列出身體若出現以下10個異常，就要提高警惕：異常嗜睡、頭暈站不穩、噁心嘔吐、視覺異常、反應變慢、意識混亂、説話異常、記憶斷片、失去意識、呼吸異常。特別係「喝嘅量同身體反應明顯不成比例」，更要帶多一分警覺，如果飲料離開過自己視線，就當佢有問題。
若懷疑自己或者身邊人可能被下藥，要緊記6件事：（1）立刻停止飲用手上嘅酒或飲料；（2）馬上揾可信任嘅人，告訴朋友、店員或現場人員「我突然唔舒服，懷疑被下藥」，切忌獨自離開，更唔好跟唔熟嘅人行；（3）唔好自己「解毒」，催吐、狂灌水、灌咖啡都係誤區；（4）保留剩低嘅飲料、杯子、瓶子，記低飲咗乜、幾時、喺邊、幾時開始唔舒服；（5）盡快就醫，直接同醫護講「我懷疑自己被下藥」；（6）若人叫唔醒、抽搐、呼吸異常，即刻報警，如懷疑遭性侵害，要盡快驗傷採證。
姣姐講多句：呢單事冇乜好笑，亦冇乜「鹹」得落。成日去夜場、酒吧度「狂歡」嘅人，呢6招都應該記得，唔好等到出事先問「點解我唔記得昨晚發生咗乜」。你嘅飲料離開過你冇？離咗就要當有問題。
黃姣姐整合｜頂硬上
