多倫多華裔男子黃躍豪（Yuehao Huang）9月11日飛往蒙特利爾，喺安飛士（Avis）以1,000多加元預付租咗一星期車，帶住全家玩公路旅行，行咗蒙特利爾、特朗布朗山、渥太華同魁北克市。根據佢 iPhone 嘅記錄，連行路一齊，全程大約1,400公里。
還車返多倫多嗰陣，佢發現安飛士另外扣咗5,900加元（約3.3萬港元）超額里程費，帳單寫住佢呢7日行咗28,933公里。黃先生話呢個數完全唔合理：「我估算了一下，這意味着我以時速180公里、24小時不停地駕駛，不加油也不睡覺。」平均一日要行超過4,100公里，即係247唔瞓唔加油飇車都未必做得到嘅天方夜譚。
即管佢已經向安飛士投訴、交齊證據，公司答應調查，但跟咗幾星期都無退款，反而叫佢重新攞表投訴。黃先生轉頭向信用卡行美國運通申訴，運通聯絡咗安飛士之後回話「收費有效」。
走投無路，黃先生聯絡咗加拿大媒體「發言者角落」（Speakers Corner）。呢度係全個故事最癲嘅位：傳媒介入之後一日，安飛士即刻發聲明，話「經過徹底審查，我們確認數據輸入錯誤導致客户被錯誤收取超額里程費用」，向佢道歉，承諾退款，並稱會加強內部程序。
黃先生話對結果滿意，但最想講畀其他租客聽嘅係：取車同還車都一定先影里程錶。呢單佢自己承認隻影咗還車嗰張，取車嗰次忘記，佢話如果有嗰張相，成個申訴過程會順得多。佢話：「無論你多麼信任租車公司，記得在開始駕駛前和之後都要拍照。」
硬蕉抽兩句：28,933公里對1,400公里，成20倍差距就靠一個「數據輸入錯誤」收埋。最癲嘅唔係安飛士計錯數，係佢哋寧願叫客重新攞表投訴、被信用卡行信「收費有效」，都唔肯自己翻一翻儀錶板，但一有鏡頭望住就一日內認錯。數據輸入錯誤好普通，普通到成個系統都要靠一個記者先有人肯改。
硬蕉哥整合｜頂硬上
