佢哋講「反詐騙」三個字最響，點知舉報完自己會俾人滅口。呢單事，係真人、真時間線、真法醫報告，唔係任何網絡都市傳説。
內地知名反詐KOL「徽劍」（本名吳愷），2024年8月以自媒體名義實名公開舉報柬埔寨安徽商會會長劉忍，指佢以商會身份作掩護，喺境外操盤大型電訊詐騙園區。舉報一出，社會高度關注，涉案犯罪集團隨即鎖定咗吳愷嘅住址同車輛資料。
同年10月，一名外號「少校」（又稱泰哥）嘅境外電詐骨幹喺境外加密通訊平台開價30萬人民幣懸賞；主犯趙冰接單踩點後將要價加到100萬元（約117.6萬港元），下令必須喺境內劫持吳愷，逼問微信公眾號幕後指使者，並強迫佢刪除所有揭發貼文。
2024年11月10日，受僱兇徒陶友艮等人喺廣東惠州大亞灣假冒便衣警察，喺澳頭大温壩市場二樓停車場將吳愷強行架上私家車，轉往惠東縣白花鎮山坡交趙冰逼問，搶走手機強逼刪除文章。押送河源途中，歹徒喺車內拳打腳踢，更用老虎鉗夾傷佢嘅手指甲逼供。翌日清晨，吳愷被轉往江西贛州定南縣龍塘鎮偏僻山林，趙冰單獨看守期間再度施暴，將佢踢至重度昏迷，用枯草草率遮蓋便逃離。
11月13日中午，當地村民喺定南山林尋獲吳愷遺體。法醫剖驗證實，死因為頭面部遭鈍性外力打擊，引發創傷性蛛網膜下腔出血及硬膜下出血致死，其本身患原發性高血壓為促成因素之一。兇徒作案後更指使他人透過支付寶向吳愷帳户轉入1.1萬人民幣（約1.3萬港元），喺網絡散播佢「因涉嫌敲詐勒索遭警方拘留」嘅謠言，掩蓋血案。
案件後續，主犯趙冰因故意傷害罪喺2025年12月一審被判死緩，2026年8月廣東省高院二審駁回上訴維持原判。幕後頭目劉忍喺2026年6月中柬聯合執法行動中落網，被押解回國受審；在逃嘅「少校」現仍正被公安追緝。
姣姐講多句：呢度冇笑位，我哋亦唔會揾。一個實名講真話嘅人，因為開口就俾人用100萬買咗條命，呢個「反差」本身就係最大嘅恐怖。電詐集團可以用錢買人、可以偽裝警察、可以假意轉帳，但法醫同法庭唔會。反詐嘅意義，正正就係讓呢類人冇影嚟行。
黃姣姐整合｜頂硬上
