AI 畫嘅圖可以告人，AI 寫嘅嘢可以攞獎呢兩件事，就喺日本同時發生咗，好值得細讀。
大阪一間內容創作公司 Sai，用 ChatGPT 等生成式 AI 工具，輸入年齡、出身、性別、氛圍、指定粉紅色髮色等指令，數秒內就出到一張髮型模特兒照。佢哋賣到全日約 4,000 間美容院做廣告，每張 1,000 到 2.5 萬日圓。Sai 向大阪地方法院入狀，控告一間千葉縣美容院：呢間店未經許可，把 Sai 嘅圖片再輸入 AI 加工，放喺廣告網站用。Sai 要求停刊；被告就話：圖係 AI 生成，唔係人創作，無版權可言。呢個係全日首宗針對生成式 AI 作品二次加工嘅著作權訴訟，法院點判真係睇落去。
文學界同一陣波。早川書房主辦嘅「早川SF大賽」2026 年收到超過 1,000 件投稿，係 2025 年兩倍以上，主辦方明言主因係生成式 AI 普及。規則原本容許作者自負責任使用 AI，而家已經改到每人限投 1 件，怕評審跟唔到。
最離譜係一位叫葦沢かもめ（Ashizawa Kamome）嘅作家。佢 4 年前靠 AI 協助已經攞過「日經星新一賞」優秀賞。佢創作流程係：將自身寫作風格整理入資料庫畀 AI 讀；叫 AI 出 3 個故事構想，揀一個，AI 跟住生成世界觀同角色，十幾分鐘內出初稿，最後人機共同修訂。佢話 3 個星期內用呢個流程寫咗 100 本小説，全部投咗各大文學賞。更狂嘅係佢講：就算肉體冇咗，訓練好嘅 AI 作家依然會替佢繼續寫，而且會寫到佢滿意。
文化廳分科會委員、神户大學法學研究科教授島並良講得好直接：非人類創作嘅時代已經到臨，現行近代著作權法底層邏輯正面臨挑戰。佢認為法律要喺「保障創作者生計」同「唔好因過度保護而扼殺有用 AI 技術」之間找平衡。
姣姐講多句：成件事最有趣嘅位，就係當 AI 畫嘅圖有價，就有人出錢買、有人搶用、有人告上法庭；當 AI 寫嘅文夠快，100 本小説三個星期搞掂，「原創」兩個字就徹底變味。邊個係作者？AI 係工具定合夥人？法例追唔到，但讀者喺度睇緊，呢場風波唔會停。
黃姣姐整合｜頂硬上
