一個小一仔喺「在某地點做某種事」嘅造句題入面，填咗「在廚房裏煮飯」，被老師判「剔交叉」，紅筆補一個「做」字，暗示正解係「做飯」。家長近日喺 Threads 發文配圖大呻，講唔會教仔中文。帖文已刪，但功課照繼續喺 Facebook 群組、Instagram 轉發，惹起廣泛討論。
網民爭「煮」定「做」，三派對壘。一派直接指「做飯」係普通話書面語：「『做飯』是普通話書面語，『煮飯』是粵語書面語」，又話「除非係普通話堂，否則在粵語地區，『煮飯』點都正確過用『做飯』」。有網民搬出曹植《七步詩》「煮豆燃豆萁」，同李漁《閒情偶寄》「煮粥常患其少，煮飯常苦其多」，話「啲老師識唔識呢句？」，用千年「煮」字壓回去。
中派講歷史：「我80年代讀小學，當年真係教用『做飯』」、有人話香港書本、圖書館從來都係「做飯」，提醒大家唔好以為「煮飯」係唯一正解。另有人放棄爭辯，喺 Threads 話老師就係球證，想攞分就要適應執法尺度。
也有體貼老師嘅：「『煮』係其中一種烹調方式，蒸、炆、燉、焗等等仲多，『做飯』嘅『做』涵蓋所有烹調，答『做飯』邏輯上較合理。」但同一批人指出，喺香港「煮飯」約定俗成已包含用各種方法煮食，小一仔答「煮飯」亦無可厚非，「若我是老師，我不會説他錯，但會在答案旁寫註解」。
網民反詰調侃：「咁『焚琴煮鶴』係咪要『焚琴做鶴』？」、「水煮魚要唔要改成『水做魚』？」，電飯煲「煮飯」要唔要變「電飯煲做飯」？
姣姐講多句：呢個最荒謬唔係「煮」定「做」，係我哋對自家語言嘅雙重標準——用普通話「做飯」就係「大陸書面語」，用「做」就係「太正式」，用「煮飯」就係「太口語」，兩個方向咩時都錯。語言係活嘅，約定俗成先係正解，唔係某一陣人訂咗條紅線，小一仔同成世人一齊跪。
黃姣姐整合｜頂硬上
