朱咪咪喺11月3日出席記者會，宣佈喺2027年1月8日同9日喺伊利沙伯體育館，開兩場《朱咪咪「又嚟開」慈善演唱會》。佢現年72歲，台上頭一句就認：「我係市儇，你睇個樣就知啦。冇錢啊，冇得傾。」
不過大會代表隨後上台爆佢：呢位市儇代言人，實際上常年不收分文到長者中心義唱，仲會自掏腰包請老人家食糕點。朱咪咪其後亦證實，自己喺新加坡、馬來西亞同香港三地都親身到長者中心表演，特意唱啱佢哋年代嘅歌，仲唔顧形象搞笑，只為博老人一笑。佢笑言：「你知啦，我成日做咁多陰質嘢，要積嚇福㗎嘛。」
姣姐講多句：一個被人話「市儇」到入骨嘅女人，出錢出力倒貼去氹長者，理由仲係「積嚇福」，呢個反差本身就係好港式嘅幽默。最抵讚唔係佢做善事，係佢做善事嘅姿態——完全冇道德包袱，做善同食叉燒包一樣自然。
演唱會方面，朱咪咪透露有兩位男嘉賓助陣：音樂前輩葉振棠，同埋佢最常合作、對話成日「九唔搭八」嘅黎耀祥。談到回港最想吃嘅點心，佢話唔食燒賣，鍾意蝦餃同叉燒包，大會特為佢備咗個三層叉燒包「放題」。
黃姣姐整合｜頂硬上
