廣東中山市一間面積約215呎（20平方米）嘅平價自建出租屋（村屋），成個廚房同廁所竟然零間隔直接連通。11月1日，當地市民廖先生向媒體反映，有睇樓客實地睇樓時發現呢個「廚廁一體」嘅佈局，大感意外，最後冇租落嚟，單位至今空置。
呢種格局，換句説話，就係你一邊切葱，一邊要同馬桶搶位置。想煮個炒蛋，成個廚房都系廁所味；坐低沖個水，抽風機吹嘅都係油煙。
11月2日事件經內地社交平台曝光後引發網民熱議，有人直言呢種格局存在衞生隱患，氣味更令人難以忍受，難怪租客睇完即走。亦有網民笑話，喺呢種廚房煮飯，恐怕會煮出「特別嘅風味」。
硬蕉抽兩句： 呢種嘅樓，喺港人耳中大概就係「細仔屋2.0」——仲細，仲冇間隔，仲多埋成個廁所在廚房入面。但話咁都，港人真係見慣嘅樓、見過嘅格局，未必怕呢個。講真，215呎仲要廚房直通廁所，我唔知係建築師嘅創造力，定係村屋老細嘅「省位」哲學。
硬蕉哥整合｜頂硬上
