近日有內地網民喺小紅書發文，列「內地人去香港最不適應的事」，由飲食、行街到搭車無一倖免，喺度大呻，引大批網民共鳴。
PO主話初到香港「相當不習慣」：入食肆發現「餐廳不讓自帶飲品，否則罰款」；叫外賣見到「外賣最低消費$60，還有高額配送費」；想食餐家常飯都嘆「沒有找到好吃的炒菜」。最冚家班嘅，係去壽司郎要「學會假裝聽懂」粵語叫號。
講到行街，PO主話喺香港「沒有電驢全靠腿」，偏偏「到處是坡，走路可以免費爬坡」，抬頭「樓挨著樓，太陽都曬不到」，行喺路邊仲會「有從天而降的水滴」，入到室內即刻「體驗一下香港室內空調」。
呢啲梗，港人每日都喺度經歷：行路免費做健身、街邊頭頂滴水、食肆叫數全用廣東話，早習慣到冇感覺，原來喺內地人眼入面全部係「不適應的事」。
資料圖片：Pixabay
交通方面，網民話「打車不習慣左邊上」、「討厭坐小巴」，本地司機駕駛風格又另當別論。有網民分享搭的士經歷：「有一次打車遇到司機伯伯頭髮全白，轉彎插隊進等紅燈的車隊，被後車司機猛按喇叭……他淡定從容毫無反應，等綠燈就飛出去。」
不過喺一連串「不適應」入面，唯一獲網民一致好評嘅，係「地鐵不用安檢（終於不用卸下大包小裹又背上了）」，仲要加「體驗過就回不去了！」車廂免費 Wi-Fi，入閘即走，順暢無閹割。此外香港「沒有電動車在馬路橫衝直撞」，加上嚴格控煙同全面禁售電子煙，亦被旅客大加分。
姣姐講多句：你行街爬坡系日常，佢行街爬坡系文化衝擊；你坐港鐵系返工，佢坐港鐵系自由。同一班車，兩套心境。點知下次去大陸，要過安檢、要將包放喺X光機入面？呢個「回不去」嘅，究竟係邊一個先？
黃姣姐整合｜頂硬上
