人稱「天下第一關」嘅公關鄭紹康（Francis），早前先喺社交網怒轟一對「low class低班男女」喺佢生日派對上擅自向在場明星「抄牌」，行為極不尊重。近日佢再發文爆料，將矛頭指向同一對男女，話佢哋中秋節期間喺上流社交圈做出連串「冇品、冇class」嘅舉動，鬧到人人皆知。
據鄭紹康透露，呢對男女同名人「A夫婦」住喺同一屋苑。中秋節當晚，A夫婦喺屋企開派對，呢個男女不請自來敲門，A夫婦出於禮貌將佢哋放入屋。怎料二人入屋後就「嫌三嫌四」，話冇冷氣、又呢樣嗰樣，A夫婦覺得莫名其妙，暗示派對已經結束催促離開。二人離開後不久，竟帶住一支「價值千元」嘅紅酒折返話要一齊飲，A夫婦就話「你鍾意就坐喺客廳飲啦」。
誰知男方突然開門，邀請其他陌生鄰居入屋參觀擺滿名錶珠寶嘅豪宅。A太見狀立刻衝落樓大鬧，將二人趕走。
最「肉酸」嘅係，二人被逐之後再三折返，要求拿返未喝完嘅半支紅酒。A先生無奈由垃圾桶撳返酒瓶俾返佢哋，二人竟然仲想攞返醒酒器（wine decanter）入面嘅酒，甚至要求借用廚房洗手盆將酒倒返入樽帶走。
鄭紹康喺文中怒斥：「請問各位有冇見過世界上有咁cheap嘅人未？實在肉酸到不能接受」，直指呢對男女「冇品、冇class、冇禮貌、冇家教」。據佢稱，A太已經「嬲到爆炸」，將呢對男女嘅惡行喺社交圈廣傳，斷言佢哋不要再想擠身名人圈。網民亦紛紛留言，討論邊個先至係真係「low class」。
姣姐講多句，呢單嘢笑就笑喺：一對自以為靠「闖」入豪宅就變名流嘅人，最後連半支剩酒都要折返去攞。高class同低班嘅分別，唔喺你住邊個屋苑，而係你喺人屋企識唔識收聲。名門豪宅嘅大門，永遠唔會為「冇class」嘅人開第二次。
黃姣姐整合｜頂硬上
