「天下第一關」鄭紹康（Francis）又出嚟爆料。佢早前先喺社交平台暗指一對「low class 低班男女」喺佢生日派對上「抄牌」索取明星電話；今次佢再喺 Instagram 限時動態揭發，呢對男女喺中秋節期間又搞出連串極度失禮嘅事。
呢對男女同城中名人「A 夫婦」住同一屋苑。中秋節當晚 A 夫婦喺屋企開 Party，佢哋喺未獲邀請下敲門，A 夫婦出於禮貌讓佢哋入屋。點知二人一入門就當面嫌棄主人家「冇冷氣又呢樣又嗰樣」，A 夫婦大感驚訝，即落客令叫佢哋離開。
二人離開後不幾時又折返，聲稱帶咗支價值港幣 1,000 元嘅紅酒嚟共飲，A 夫婦話「你鍾意就坐喺客廳飲啦」。誰料該名男子竟擅自開門，邀請其他陌生鄰居入屋參觀 A 夫婦嘅豪宅。鄭紹康指家中擺滿「價值連城嘅擺設同手錶珠寶」，佢哋無權帶陌生人闖入。A 太太見狀「衝落樓下大鬧」，逼二人即刻離開。
最令人咋舌嘅係，二人離開後竟再次折返敲門，要求拿回嗰支未飲完嘅紅酒。A 先生無奈喺垃圾桶揾返剩餘半支紅酒還佢哋。點知佢哋接過酒後仲加碼質問：「仲有半支喺個醒酒器，可唔可以攞埋走？」當 A 先生問點樣攞時，佢哋竟提出借用廚房洗手盆，聲稱「可以小心翼翼將醒酒器入面嘅紅酒倒返入樽」。
鄭紹康喺文中怒斥：「請問各位有冇見過世界上有咁 cheap 嘅人未？實在肉酸到不能接受。」佢更透露 A 太太「嬲到爆炸」，已將事件喺圈內廣傳，並斷言呢對男女「要升班攀爬擠身入社交名人圈，真係諗都唔使諗」。
姣姐講多句：客氣過頭就有人敢得寸進尺。不請自來、被趕走仲要折返攞酒、連醒酒器入面嘅殘酒都唔放過，呢種「升班」心態仲想擠入名人圈，實屬痴人説夢。做客人最緊要有分寸，唔好以為識路入人屋就算熟客。
黃姣姐整合｜頂硬上
