張致恒（Steven）「一腳踏五船」桃色風波事隔多年，今次喺專訪首度正面交代，呢件事對佢造成嘅傷害，最大嘅唔係風波本身，而係嗰個甩唔走嘅標籤。
佢話當日喺 TVB 一廠門口被記者圍住，有人問「你咁樣會唔會係患病？會唔會係性上癮之類？」，佢隨口回咗一句「可能有咁嘅問題」，純粹想開個玩笑打圓場。「呢三個字，其實喺呢十年以嚟，對我嚟講係一個最大嘅傷害。每一次見到標題寫住『張致恒性上癮』，係唔好受。」佢承認呢句係今生最懊悔嘅失言。
風波之後佢嘅演藝事業直插谷底，自稱放下藝人光環，做過麵廠、洗碗、拉寬頻線、跟車送電器等散工。佢話曾去一間酒店應徵房務員，被經理當面逐客，話唔想佢影響酒店聲譽。
佢話而家一家六口背負逾百萬債，屢遭截電、被迫搬家，曾喺旺角揾財務公司借錢，對方逼佢唱《死性不改》先肯減息，佢咬緊牙關冇唱。
最重嘅，係佢同太太雯雯四個仔：7歲大仔天寶有情緒問題、6歲二仔天牧確診自閉症及過度活躍症（SEN）、4歲三仔天朗係早產、呼吸有問題，「晚晚都要聞氣」；3歲細仔天樂未有病況記載。佢話每晚要同老婆分房瞓、等仔瞓熟偷偷出去露台喊，「每晚同耶穌講，你帶我走啦」。
網民一直勸佢領綜援，佢堅拒。佢話細個時跟住領綜援嘅爸爸去郊野公園同沙灘做社會服務，留下心理陰影；另外領綜援就唔請到外傭，佢同太太根本冇辦法獨力照顧四個仔。
妻子雯雯因長期高壓，喺社交平台多次公審佢、要求離婚，被網民戲稱為「離婚界KOL」。張致恒話唔會阻止老婆上網，「如果佢連唯一發洩嘅地方都冇，我擔心最快黐線嗰個係佢」。
佢話無論任何人勸分開，佢都唔會離婚：「我覺得一個完整嘅家庭，必須有父母同小朋友先算係完整家庭……就算幾辛苦都好，我唔想小朋友喺單親家庭入面長大。」
姣姐講多句：一個男人在鏡頭前逐個講自己仔嘅病、講自己幾怕、講自己點樣撐，呢種坦誠本身就夠罕有。最難受嘅標籤係傳媒同公眾貼上去、佢甩唔走；最難嘅選擇係佢自己揀返嚟——唔離婚、唔領綜援、撐住。
黃姣姐整合｜頂硬上
