近日，曾演出熱門陸劇《墨雨雲間》、《逍遙》並參加《乘風2025》嘅喜劇女星張小婉，同埋佢自己嘅經紀人錄咗一期 Podcast 對談。原意大概係輕鬆吹水，點知經理人開口就語出驚人，大爆娛樂圈黑幕，仲直言：「男藝人現在很危險的，男藝人是比女藝人危險的。」講完即見張小婉嚇到花容失色，忙著戴上耳機摀耳：「少説點吧姐呀！妳是要毀了我嗎？」呢句講完即喊停，就係今次事件最搶鏡嘅反差。
被問到圈內潛規則，經紀人話自己轉做經紀人前，做咗 11 年化妝師同 3 年統籌，喺劇組就遇過不當騷擾，指有執行導演或仗勢欺人嘅主創演員，會「藉著討論工作名義半夜敲房門」，然後「跟你動手動腳」。佢同時話，而家社群網絡力量大，若再有人亂嚟，直接公開發上網就能令對方無法喺圈內立足。
點到男星市場，經紀人話：「男藝人現在很危險，受眾更廣。」暗示男星面臨嘅隱形威脅同誘惑，可能更勝過女星。
片段流出後衝上微博熱搜，網民反應幾多：有人話「難怪有些男星資源突然暴漲」，有人嫌「這也太魔幻了，男藝人以後是不是要帶防狼噴霧？」，更有網民分析「女藝人面對男領導，男藝人卻可能同時面臨男女高層的壓力」，指演藝圈水太深。
姣姐講多句： 呢種「講出聲就即刻被喊停」嘅畫面，本身就係行業文化最真實嘅縮影。業界對性暴力指控向來避而不談，而男藝人所面對嘅同類風險，因為長期缺席公共討論，反而更加難以開口。呢單事件未必係「全網笑瘋」嗰種，但值得大家安靜咁睇清楚入面講緊乜。
黃姣姐整合｜頂硬上
