張敬軒今日（25日）現身TVB電視城，擔任節目《飛常好聲音》嘅評判，門外有近百位fans等候。清減不少嘅佢，亦係自急性內耳迷路炎之後，首度接受傳媒公開訪問。原來佢5月喺啟德主場館參加《25+ 英皇群星演唱會》時，因身體不適被送進急症室，其後確診急性內耳迷路炎，並取消翌日部分表演。問到身體狀況，佢笑指「完全冇事，7月份就completely好晒啦」，仲指已經辦咗幾場show。
問到會唔會好似陳奕迅咁搞錄音室場，張敬軒即話好難度：「係實力體現！我睇到都覺得佢勁啊！只有個library好豐富嘅歌手先至可以咁多場！」佢又話，有啲舊歌當年錄音及製作未夠好，但fans聽咗咁多年已經入腦，《櫻花樹下》、《餘震》雖重新編曲，fans都覺得當年版好啲，如果有得揀就揀《酷愛》。
最重磅就係預告：明年（2027）喺香港開騷。佢透露正式開show之前，會先搞幾場實驗性嘅演出，揀特別場館，「畀自己warm up下先」。
《軒公敲碗》點解會停？張敬軒自爆係YouTube帳號拆數問題：「有啲新公司嘅歌酬、版税，《軒公敲碗》計咗落舊公司嗰度，舊公司啲錢反而冇嚟到新公司，即係冇嚟到英皇。」佢話而家正同YouTube傾，會開一個全新嘅Channel。
12月佢同澳門中樂團合作嘅《Unplugged • 盛樂演唱會》，首次兼任藝術總監，佢話擔心籌備時間不足。另外佢又話已買定飛，今個週末（1號）去睇好友王菀之嘅舞台劇，「佢嘅Show其實係唔可以錯過嘅」。
姣姐講多句：一個人喺最難熬嗰陣硬拗起嚟，喺鏡頭前面仲可以笑得咁開、仲預咗自己明年「warm up」、仲要兼藝術總監、仲買飛撐女仔——呢種「復甦模式」開足，比佢任何一首《餘震》都震。
黃姣姐整合｜頂硬上
