璀璨之城幕後｜高海寧拍戲爆喊張智霖慰問被拒

TVB 娛樂訪談節目《一週星星》今晚（25 日）請到熱播劇《璀璨之城》團隊，張智霖、吳卓羲、高海寧、張曦雯同江美儀一齊上節目，接受主持區永權訪問，大談拍攝期間嘅爆笑同崩潰時刻。

《璀璨之城》播出後最惹眼嘅，係張智霖演嘅反派「官孝賢」奸到出汁。講到全劇邊個最陰險恐怖，幾位嘉賓竟一致指向張智霖，笑指「佢笑住嚟奸」。飾演他老婆嘅高海寧更煞有介事話：「我唔敢講啊！驚佢折磨我。」江美儀形容佢「陰陰濕濕好恐怖」，張智霖竟然唔收貨，仲話「睇返片，我覺得自己太多反應，再好啲嘅可以。」江美儀即刻派定心丸：「我成日同人講呢套戲一定要睇 Chilam，上次 Cool 魔可以 10 年，呢個係佢第二個 10 年。」

但最爆笑嘅，係張智霖自曝拍攝時嚇到女配崩潰嘅一段。高海寧自揭：「我最後係逼到自己匿埋喺窗簾後面喊。」張智霖聞言「自首」：「Cut 咗機之後，佢自己縮埋一角喊，我心諗死嘞！我係咪過分咗呢？問佢 OK 嗎？都未講完，佢話『唔好掂我』，冇咩事我出去先。」講完全場爆笑。拍戲拍到人匿窗簾後面喊，慰問都食檸檬，張智霖今次真係「陰」過火線。

今集仲有「本尊 Fact Check」環節追「張曦雯同吳卓羲戲假情真？」傳聞。全場訪談中，張智霖都有意無意取笑吳卓羲對張曦雯處處維護；張曦雯被問到「劇中老公」吳卓羲有咩優點，即甜爆答：「多到講唔晒，《兩周星星》先得喎！」另外「你問我答」環節請到黃宗澤、薛家燕、陳豪、王丹妮等隔空提問，包括「Chilam，你會讓兒子入娛樂圈嗎？」，以及「Ron，你有咩黑歷史演出？」，吳卓羲罕有公開黑歷史。