2006年《歡樂滿東華》直播，鄭希怡（Yumiko）表演空中飛人時被錢嘉樂扯甩長褲，全港睇直播嘅都知有呢幕。今年Yumiko（現年45歲）喺HOY TV節目《九運會客室2》受訪，罕有重提呢個意外，以及佢之後幾個月點樣同自己「過招」。
當晚喺半空交接，Yumiko話自己頭朝下、腦袋一片空白：「我完全唔知發生咩事，但係就覺得有啲嘢發生咗，跟住就跌咗落去下面。」佢知直播緊，又唔知點面對。事發當晚公司仲召佢返台向媒體交代，佢話「淨係識得喊，我話我要返屋企」。
最令Yumiko難受，係事發後出街見人微笑都會覺得：「係咪笑緊我？」佢話那段時間樓下有狗仔隊，自己根本唔敢出街。
阿Sa同容祖兒知道後上門陪伴，冇傾事件細節，淨係陪佢敷mask。Yumiko特別感謝：「身邊有人陪呢個好緊要！」
節目中伍詠薇就主持曾志偉當時「有冇得慢鏡睇多次」嘅戲言，不點名開炮：「嗰啲都Bull shit嚟㗎！人哋咁尷尬，一個細路女、後生女，一個唔關佢事嘅失誤呀！」
Yumiko話最終佢同自己講：「我冇做錯，我做緊善事㗎喎，我冇怪過任何人，亦都唔應該怪自己。」
姣姐講多句：呢次重提，唔係賣慘，而係真誠講出當年嘅掙扎同最終同自己和解。真正尷尬嘅從來唔係Yumiko，而係當晚開「慢鏡重播」笑嘅人。
黃姣姐整合｜頂硬上
