袁潔儀與寶珮如上HOY TV節目《九運會客室2》，在鏡頭前重提寶珮如1999年車禍的慘烈經歷。兩姊妹憶述當年患難歲月時情緒失控，淚崩，連主持伍詠薇都感同身受當場爆喊，錄影廠內三個女人齊齊抹眼淚，氣氛沉重催淚。
寶珮如在節目中回憶撞車一刻：「撞車我傷咗好多骨，面骨、牙骨、鼻骨、盤骨。」她透露盆骨一度被撞出，被衝擊力撞返入位，若撞唔返返個位可能坐輪椅。面部多處需要「上螺絲」鞏固，牙骨碎裂，面部矯形手術歷時三年，期間每隔六個月做一次手術，更要24小時穿上度身訂造的壓力衣，令她形容「好像坐牢一樣」。
袁潔儀憶述當日趕赴醫院探望寶珮如時的心理衝擊：「見到佢個樣，我忍唔住同佢講『Baby，我有啲急尿，我去一去廁所先。』其實去廁所喊，喊完扮冇事出去安慰佢。」她坦言當時非常憂心好友的前途：「我哋靠樣揾食，都唔知佢未來點算！我自己都好驚，佢點啊？」為了不讓寶珮如受刺激，病房內所有鏡子均被收起。
龐大醫療費令寶珮如花光積蓄，一度窮到向好友借錢度日。袁潔儀每月主動打電話給她：「我有錢返嚟，你攞去頂住！」
最意想不到的是，寶珮如於節目中首次透露，袁潔儀在出事同年正處於事業愛情兩失意的低谷——遭亞視解約，相戀多年男友離去，陷入「雙失」絕境。寶珮如自稱直至節目錄影當日才得知袁潔儀當時的困境，這段支持隱瞞了足足27年。
袁潔儀面對好友的感激，表示看到寶珮如堅毅求生意志反而成為她的救贖：「我個樣明明可以見到人嘅，佢咁堅持，我做乜唔堅持落去呀？我有手有腳，呢餐揾到我畀你，下一餐我揾得仲多呀！」全場動容。
姣姐講多句：呢個故事最動人的唔係「塞錢」，而係兩個女仔互相撐住嗰種骨氣。袁潔儀自己都係被拋低谷底，冇人拉佢，反而拉住身邊的人。寶珮如27年後先知呢個秘密，證明真正嘅支持係冇人知、冇人讚嗰種。我睇完好觸動，但更覺得呢個社會最缺嘅，就係呢種唔使講出口、唔使人知嘅情義。
