袁澧林今日（13日）凌晨發長文，控訴喺受訪時遭遇性騷擾。同一日，演員鍾雪瑩亦喺 Instagram 限時動態發帖，公開批評一名文化界寫手兼主編嘅評論文章字眼「嘩眾取寵」，並指內容同佢嘅電影《善男信女》無關。

兩件事相繼出現，將焦點指向文化界嘅評論及報道亂象。曾執導《翠絲》、《濁水漂流》同《眾生相》嘅導演李駿碩，其後轉發袁澧林嘅帖文表態聲援，喺聲明中點出所謂「男性紅利」問題。

袁澧林其後再發限時動態，提出五點補充，強調唔會公開涉事文化記者嘅身分。

姣姐講多句：呢類事唔係「睇開啲就過咗」。女仔喺公開場合做訪問，本已經係處於權力不對等嘅位置，若果連呢個都唔安全，背後反映嘅係一整套將女性物化、將鹹濕話當「行業慣例」嘅結構問題。發聲係需要勇氣嘅，而唔發聲往往就代表默許。唔會講太多，但呢種事唔該再被「淡化處理」。