由丞磊、徐若晗領銜主演嘅民國愛情劇《玉簟秋》，自開播以嚟炒到全網發熱。官方喺10月25日（週六）公佈咗最新追劇日曆，排播表上以醒目筆觸圈出「直通大結局」，確定全劇於11月1日（週日）提前迎來終極收官，比網民早前推算嘅11月4日足足提早3天。
芒果TV喺10月最後一週明顯加速：10月26至29日每日雙更，集數由第25集推進至第32集；10月30、31日每日1集，推展至第33、34集。11月1日當日除常規排播第35集外，日曆欄位上方特別圈出「直通大結局11月1日」，會員可透過付費積分或特別禮遇，一口氣搶先解鎖第36至40集嘅終章，實現直通收官。
至於電視台方面，湖南衞視「金鷹獨播劇場」受傳統排期限制，10月26至29日每晚播2集（第21至28集），10月30同31日連續兩晚暫停播映電視劇，11月1日晚先恢復播出第29至30集。即係話，11月1日當晚串流平台已直通第40集大結局，電視台觀眾只睇到第30集，進度落差一口氣拉到整整10集。
內地影視發行人士分析，官方今次調整採用近年大熱內地劇常見嘅「大結局點映禮」模式，既趁劇集熱度正高時鎖定觀眾，又避開電視台因晚會或節目調動而延播嘅變數。
姣姐講多句： 排播表上面寫住「直通大結局」，仲特別用手寫圈出嚟，呢種排面真係好似奶茶店寫住「最後一杯，賣完真係冇」咁有迫力。電視台觀眾仲要再等等，串流平台已經一衝到底，呢個落差就係付費會員嘅代價。
黃姣姐整合｜頂硬上
