日前資深傳媒人汪曼玲喺自己嘅 YouTube 頻道訪到「亞視一哥」尹天照，這位移居內地多時嘅前亞視小生，由太太 2011 年患血癌開始，一步步講到最後喺番禺置業、生活無壓力嘅心態變化。
尹天照憶述，當年太太患病，自己為照顧佢推掉大部分演藝工作，又因太擔心而患類風濕，收入一度歸零。佢曾跪地祈禱，求上帝以命換妻健康，最終太太奇蹟康復。今次佢喺訪問中再談起那段生死關頭，話經歷咗先係真正改變咗人生觀。
而最引人注意的是佢對內地生活嘅評價：「香港真係好慘，我哋揾錢揾得好辛苦，又唔係話揾好多，但係我哋洗費好大，而家睇到好多香港人，都移居去內地，開開心心，食得好、住得好，人冇壓力，健康就自然好。」
佢話自己同太太喺番禺已經置業，仲計劃賣埋香港嗰層樓，喺港租一層，全家定居番禺。佢試過同朋友睋樓，四房一廳三浴室，仲有兩個大露台，只售 350 萬，「喺香港車位都 200 幾萬，買個車位，補多 100 萬，就可以有咁大。」
資料圖片：Pixabay
最勁嘅係醫藥價差。佢話自己同太太都要覆診，現在已經「密謀」返內地區內覆診，「本來有啲針佢哋係冇，但係都幫我揾到，仲要平過香港，講緊兩支針平過香港三、四千蚊。」
佢又提到，太太患病時花咗逾百萬醫病，「有乜嘢重要得過生命？」佢話人生好短暫，而家五十幾、六十，最緊要兩公婆開心過埋下半生。佢仲話自己物業基本上全部寫咗太太名，只係內地嗰層例外，「就算離婚都要分一半畀佢，我信我太太，我太太信我，我覺得冇嘢比信更加重要。」
姣姐講多句：呢個唔係乜「北上潮」大道理，係一個揾過錢、醫過病、經歷過生死嘅中年男人，講出真係最簡單嘅一句話：住得舒服、無壓力、得信你嘅人，就夠了。至於「兩支針平過香港四千蚊」，就係最接地氣嘅註腳——香港嘅平，喺邊度都揾唔到。
黃姣姐整合｜頂硬上
