The Weeknd 成日喺啟德體育園開唱，仲破天荒推出專為香港度身訂造嘅新歌〈Hong Kong〉，入面無縫採樣咗王菲嘅經典粵語名曲〈季候風〉，一開波呢首陳年金曲即時爆紅，全城陷入「季候風熱潮」。2001 年港姐冠軍楊思琦都加入翻唱行列，喺小紅書上載咗一段唱〈季候風〉嘅短片，本以為憑「甜美港姐」招牌形象加不俗歌喉可以博啲掌聲，點知一出片就引來網民瘋狂洗版，話呢場係「車禍現場」加「時尚車禍」嘅雙重打擊。
片入面楊思琦紥起雙辮、一臉陶醉對住咪深情演繹。但大批香港網民聽完即刻「黑人問號」：佢明明係土生土長嘅香港人，點解唱廣東歌會帶到莫名嘅鄉音同口音？留言寫住「唔好破壞首歌個vibe好嘛」、「唱到咁有口音」、「點解個唱腔可以老過李司棋」，仲有人問「Target緊香港定內地？」
除咗唱腔出事，造型都「中伏」。佢肩膊上披住一條印滿「雙C」Logo 嘅灰色格子大披肩，原意似係想增添貴婦名媛氣質，被眼尖嘅網民一眼看穿係 Chanel 嘅「山寨」冒牌貨，恥笑為「Channel」披肩。網民酸爆：「條披肩...思琦唔好咁得唔得呀......」、「無啦啦又攪啲老翻披肩……」
不少網民表示戥佢可惜，話佢明明係起點極高嘅港姐冠軍，近年卻頻頻因為品味崩壞、用力過猛嘅「大媽風」而喺內地社交平台出洋相，令人不勝唏噓。
姣姐講多句：全城跟風翻唱，有人唱得風，有人唱成車禍。歌嘅 vibe 係王菲嘅，披肩嘅 logo 係 Chanel 嘅，楊思琦自己喺度唱得「有口音」——三重身分重疊喺一個人身上，點算都唔衝突。跟風唔難，難喺跟住風嗰陣要知自己係邊個。
