近日，日本漫畫家矢野トシノ利喺 X 連發多帖，宣佈自己嘅連載作品《これからだんだん幸せになっていく怖い女上司》暫時停更。原因唔係外出取材，都唔係身體出咗咩毛病，而係佢喺屋企踩喺折疊椅上整理東西，椅子突然斷咗，佢整個人向後跌，後腦杓狠狠撞到桌緣，流咗唔少血。
佢喺公告入面寫得直白：「由於我爬高整理東西摔倒，撞到頭導致流血，還叫了救護車。因此連載暫時停更，非常抱歉。」佢補充，事故發生時仲保有意識，所以救護車係佢自己叫嘅。
到咗急症室，佢接受咗 3 個鐘嘅檢查，包括拍咗電腦斷層，確認頭骨冇異狀，當天就出院返屋企。佢仲畫咗一幅意外現場嘅示意圖，同埋貼出真實嘅意外現場相。
真正引發網民熱議嘅，係佢事後一系列自嘲帖。佢寫：「真沒想到我會因為自己而同時解除『叫救護車』和『搭救護車』這兩個成就啊……」又話「狠狠撞到後腦杓送醫，但是當天就能回家，該説是不幸中的大幸嗎」，仲貼咗張頭盔相笑言「要是當時戴著這個頭盔，應該就不會有事了吧」。佢亦坦言，比起頭部，左手肘仲痛得多，並感嘆「能活著真是太好了」。
有網民吐槽佢點解要踩喺呢種折疊椅上，都呼籲佢保重身體，都話從未聽過噉嘅停更理由。
姣姐講多句：呢單事好笑，但笑完真係要講句正經。折疊椅唔係為人踩嘅，呢個「叫救護車」同「搭救護車」嘅雙成就，解鎖一次真係已經夠，大家唔好照做。佢頭骨冇事係最緊要，左手肘慢慢復原就好。漫畫家停更理由聽落五花八門，「外出取材」都見慣，但「後腦杓撞爆」呢個理由，相信係頭一遭。
黃姣姐整合｜頂硬上
