資深藝人吳岱融日前接受新城知訊台節目《Ben 同 Benson「chur」住傾》主持人李有毅及李國煒訪問，暢談入行40多年嘅起伏。年過60佢即場按李有毅要求，將「隻腳放上個頭」，展示筋骨柔靭程度。

斷腳見骨，反成事業轉機

吳岱融憶述初出道時喺新加坡拍劇，因跳彈床山意外導致腿部嚴重受傷見骨，被迫停工一年多。佢話呢次受傷「未必是壞事」，正因為此先返港，其後加入TVB，遇上《絕代雙驕》嘅花無缺一角而成名。佢形容呢個角色「基本上不用怎樣演，企定、懶cool咁望住人，已經係『花無缺』」。

至於喺《巨輪II》飾演高天鷲，佢話已離開電視台約20年，初聽角色性格時「心如鹿撞」，拍攝時忘形到「cut機」後就忘記自己剛講咗乜。

「加拿大空氣戒煙法」

養生之道方面，佢話已戒煙十多年，笑稱當年前往温哥華探望住在森林區嘅妹妹，因為「連空氣都係甜嘅」，藉著「加拿大空氣戒煙法」成功戒煙。佢建議大家每天拉筋、經常梳頭，又分享拿手菜「魚露炒芥蘭」，強調吃得簡單、保持規律，就係佢多年保持精神飽滿嘅秘訣。

太太「整定」，「個嘴飛嚟飛去」

談到同太太鍾淑慧嘅緣分，佢直言「整定嘅」，之前交往嘅對象均未令佢有結婚念頭。佢大爆太太喺家裏「個嘴飛嚟飛去」，常常錫佢及兒子。

談及兒子想保持單身，佢指「佢轉數高過我嘅」，佢向兒子表明想抱孫，不婚但產子都可以，並以「每人頭上一片天」回應，尊重兒子嘅人生選擇。

姣姐講多句： 60歲仲能放腳上頭，斷腳見骨仲能變成花無缺，呢個人真係越跌越彈起。最搞笑係「加拿大空氣戒煙法」，原來温哥華真係可以戒到煙，點解冇人早啲同我講？