黃子華近日被網民喺街頭「野生捕獲」，原來佢正拍攝歌手周殷廷（YT）首次執導嘅新片《雨夜之徒》。相中子華頂住微鬄亂髮、身穿殘舊外套，造型極度滄桑，同佢喺賀歲片《夜王》入面嘅靚仔型佬造型判若兩人。佢仲站喺一輛深色私家車旁，車頂放住一盒疑似蛋撻嘅食物，有少少「拍戲都要食飽先」嘅神韻。
有網民喺小紅書上載呢張照片，配文寫「黃生出來營業了~」，即刻引發大批人競猜角色。有人推測「滄桑刑警或者受害者家屬」，有人直接喊「黃生反派」、「想看 BT 子華」。發帖嘅樓主仲親自回覆：「反正不是林過雲」，大派定心丸。
講嚇背景，《雨夜之徒》取材自八十年代「雨夜屠夫」林過雲故事，但週殷廷強調呢部戲並非直接翻拍真實案件，而係一個延伸嘅全新懸疑故事，陳穎倫監製。今年 8 月，有市民拍到黃子華、任達華、周殷廷同陳穎倫喺餐廳茶聚；任達華 1992 年《羔羊醫生》就曾演過以「雨夜屠夫」為原型嘅角色，今次兩位「好戲之人」齊齊入組，噱頭十足。
周殷廷仲早喺紅館演唱會透露已邀請杜德偉加入；有內地網站更顯示女主角係佘詩曼，如果屬實，佢同黃子華係繼《絕代商驕》《棟篤特工》後第三度合作。
黃子華早年被指「票房毒藥」，憑《毒舌大狀》《破·地獄》《夜王》洗脱污名，成為「票房靈藥」，今次接拍呢部奇案電影，係佢近年最離經叛道嘅挑戰。
姣姐講多句：子華神從「靚仔型佬」一夜變身「雨夜殺手」，呢個反差本身就係最好嘅噱頭。佢拍片最鍾意就係扮「衰人」，觀眾好驚又好笑，蛋撻放車頂嗰個細節，都係最港式嘅拍攝花絮。
