余文樂同前妻王棠云今年7月宣佈離婚，結束近9年婚姻，一對子女由佢哋共同撫養。近日王棠云帶同一對子女余初見（Cody）、余初心（Celest），同余文樂老母遠赴長沙，探班佢喺內地綜藝《披荊斬棘2026》嘅錄影。佢喺IG曬出全家福，留言「家人陪伴工作」，離婚後罕有公開同框，完全零尷尬。
相入面見到佢拖住女仔手上台，一對仔分別被節目藝人米卡同艾熱抱喺懷，氣氛融洽；佢老母都開心同艾熱、張彬彬等藝人合照留念。最勁係佢仲搞笑曬出王棠云同張彬彬嘅合照，寫「佢係為咗佢嚟嘅」，足見離婚後毫無芥蒂。
呢檔節目對佢嚟，係傳出患驚恐症之後重新出發嘅復出之作。佢婚後曾一度半淡出幕前、到台灣生活，離婚後就火速北上，參與《披荊斬棘2026》。
除咗收花，佢喺節目亦大展「潮流教父」本色。有指佢特地向一眾「哥哥」送上自家品牌潮鞋，每雙約1,700人民幣（約1,989港元）；米卡喺節目表示想試穿佢嘅皮褸，佢就二話不説，將同款約16,000人民幣（約18,724港元）嘅皮褸割愛贈佢，事後仲喺社交平台大讚米卡穿得帥氣。佢之前仲極力邀請米卡加入自己嘅隊伍，自爆因為子女好鍾意米卡。
姣姐講多句
離婚唔一定係老死不相往來。有人拍完就拉黑，有人拍完仲帶一齊睇戲。余文樂呢種體面，同埋對自家產品嗰份豪氣，真係冇乜好挑刺。
黃姣姐整合｜頂硬上
